|
اووچی "یاشار" ین ناغیلی |
|
بیریسی واریدی بیری یوخیدی |
چوخلاری آجیدی بیری توخیدی |
|
چوخلاری آلدانان بیری آلدادان |
دونیادونمور نیه بویله قایدادان |
|
دویسون بو سوزلری یولداشیم منیم |
دیلداشیم ائلداشیم سیرداشیم منیم |
|
قوینوندا گزدیرسین اوره کلر سوزون |
دوشونجه سی چوخدور یاشیندان اونون |
|
روحو بویوک نه بویو وار نه ائنی |
سوزلری یاندیریب یاخدیردی منی |
|
آی نه بولاندیردی کونلوم چایینی |
گورنمرم بیرده اونون تایینی |
|
ایندی ده آیریلمر سوزلری ده ییر |
سویله ییم سوزومی ناغیلدان شعییر |
|
*** |
|
گونلرین بیر گونی پاییز چاغیندا |
یاشیل یارپاقلارین آلانماقیندا |
|
سویله میشلر یاشار آدلی بیر اووچی |
ائل یوردونا گئجه گوندوز قوروقچی |
|
اووا گده لییدی یاراق باغلادی |
یاردان آیریلاندا کونلو آغلادی |
|
سحر گون چیخمامیش چیخدی اوبادان |
سالا بیلمز اونو داغدا آیاقدان |
|
چارغی آیاقدا چانتاسی بئلده |
سوندورنمز یانار کوزونو سئلده |
|
ااوودان اوترو اونو سالان چوللره |
کونولده عشقیدی نازلی دیلبره |
|
قلبینده بسله میش سایسیز سوگیلر |
ائلینه یوردونا اودا اگیلر |
|
اومید لر بسله میش گلن نسلینه |
اوغلونا قیزینا سونمز اصلینه |
|
*** |
|
آز گئددی چوخ گئددی مئشه یه چاتدی |
آرادی آختاردی یر گویو قاتدی |
|
یاخنی اوزاقی قوزی گونشی |
اورمانی آرانی یوخوش انیشی |
|
جیراندان مارالدان نشان گورمه دی |
نشان اولورسادا اووا سورمه دی |
|
یورقون سولقون گلدی اوبایا ساری |
گل دوشون سوزومی دیققتله باری |
|
اووچی یورقون حالدا یولو گلنده |
یورقون حال دا نه دئییم قان تر ایچینده |
|
حیران قالدی، گوردو یولون دوزونده |
بیر مارال دایانیب اوز به اوزونده |
|
اووچو چکدی اوخون قویدی کامانا |
اما گوردو مارال قاچمیر بیر یانا |
|
اوز اوزونه دئدی گوز گوره ن ایشی |
کسمیر معناسینی دوشونجه دیشی |
|
بس نه چون قاچماییر اوخون ئونوندن؟ |
حیران قویوب نه چون منی اوزوندن؟ |
|
بوراخدی چانتاسین یای اوخو آتدی |
مارالین قارشیسیندا حیرته باتدی |
|
گوردو مارال اونا باخیب آغلاییر |
هر گوره نین اوره ک باشین داغلاییر |
|
اووچو هارای چکدی دئدی دیله گل |
بوندان چوخ یاندیر ما منی بری گل |
|
مارال دئدی یوخدور حالین سوروشان |
بیلمیرسن رحم سیز سنه سوز قوشان |
|
نه یازیب آلینا قارا باختینا |
آغلایاجاق گویده قوشلار حالینا |
|
سحر سن اوبادان آیریلان زامان |
جیران دالیسیندا قاچاندا هر آن |
|
قرخ قولدور حرامی، قیلینجی قانلی |
ائلینی تالادی قویمادی جانلی |
|
بارلی وارلیقیوین بوداغین کسدی |
سندن سونرا کیمسه دویماز بو دردی |
|
*** |
|
من دئمیره م سیزده روا بیلمه یین |
اووچو نئجه کسدی قیردی ایمه یین |
|
آوازیب یاتاندا امیدی یره |
گوره نده اوباسی دونوب دوز یره |
|
سیندی قول قانادی یانینا دوشدی |
وارلیقی پوزولدی اولومه توشدی |
|
اولمور داها حایات معناسی اونا |
زیللتله یاشاماق کسکیندیر اونا |
|
هئچ نه قایتارانماز اونون وارلیقین |
ایلکیندن آجیدیر ایشی دونیانین |
|
دوغرودور آرزوسو بیتیبدیر اونون |
اما علاجیدیر اولدورسون اوزون؟ |
|
یاشار یاشایشین دویوشده تاپدی |
دوزگون حایات یولو بیر اینجه ساپدی |
|
باتماز قولاقینا شیرین امیدلر |
ازلدن اولموشدو بارسیز سویودلر |
|
*** |
|
اووچو سایاقیندا ایزله دی گویدن |
قرخ آتین ایزینی داغدان دره دن |
|
داغین آرخاسینده ایتگین بوجاقدا |
تاپدی حرامیلار یرین قیراقدا |
|
یاشار آنلاییردی جان قورتارانماز |
بو قانلی دویوشه قالیبدیر بیر آز |
|
حرامیلار آلدی یاشاری حصره |
یوخدور اونا اومید ذره جه نصره |
|
الیندن توتانی بورلاغاندا یوخ |
قرخ قیلینج ئونونده نیلر یای بیر اوخ |
|
قورتولوش ئولومده یاشار بو اولوم |
آدین یاشایشا یازیلسین گولوم |
|
آنجاق قرخی ایدی اوتوز دوققوزا |
آخدیردی اوخونو ییرتان قودوزا |
|
اووچو تکجه بیلدی اوخ آتماقینی |
قودوزلار آخدیردی تمیز قاننی |
|
آل قانیندان بویاندی یر نفسی |
اوجالدی داغلاردان انتقام سسی |
|
یر تیتره دی دوندو ایستی اوجاقا |
قاچماق اولماز بو حالدا بیر بوجاقا |
|
قودوزلار بیلدیلر بو یر بو توپراق |
آلاجاق جانلارین بوتون یوموشاق |
|
سارماشیق تک قورخو آلدی جانلارین |
دونداردی داماردا گزن قانلارین |
|
آلیشدی یر آلودان گوی قارالدی |
قولدورلارین نفس یولو دارالدی |
|
جیریلدی یر آغزین آچدی دیبیندن |
محو ایله دی اوغرولاری کوکوندن |
|
دوزمز اودلار یوردی اونا دولا یاد |
اونون وارلیقینی ایله یه ر بر باد |
|
من دیله رم بویله اودلار یودونی |
سوندوره یادلارین هوس اودونی |
|
*** |
|
بوردا سونا چاتدی کونلوم ناغیلی |
اما هله واردیر نچه یازیلی |
|
سوزوم گزیر تللی کونلوم سازیندا |
قوی دینسین قلمیم سوزون آزیندا |
|
نه بوش یره امید وریب دیله رم |
نه بوش یره شعیر قوشوب دینه رم |
|
اصلینی کوکینی اوزون سسله ین |
دوغرودان قورخمایان امید بسله ین |
|
تانییار قورخونو گوره ر امیدی |
بوندان باشقا بوتون شیرین یوخودی |
|
(شعر: دمیرچی نوه سی) |
